၀့ႈတကူဥတလးပ႕လီႈက၀ီၚ မၚလၚကပီၚ၀ဲ တႈကူဥဘဥကူဥသ့အဎူဘလံဥ တႈကစီဥ

တႈကူဥဘဥကူဥသ့အဎူဘလံဥ လ႕အဘဥတႈကရ႕ကရိထီဥအီၚလ႕ ၀့ႈတကူဥတလးပ႕လီႈက၀ီၚ တႈကူဥဘဥကူဥသ့အခီမံဥရွ႕ႈ မ့ႈ၀ဲဖဲ ၂၀၂၅ လါနိ၀့ဘ႕ဥ ၂၂ သီ မုႈဃုနံၚ လ႕၀့ႈတကူဥ St. Mary’s Cathedral ဒီးမ့ႈ၀ဲတလးပ႕သ့ဥတဖဥ သီခါသ့ဥတဖဥ ပွၚလ႕အအိဥဒီးအတႈအ႕ဥလီၚအီလီၚ (Religious) သ့ဥတဖဥ ပွၚလ႕အသူဥထီဥကေိဒီးသရဥသိဥလိတႈသ့ဥတဖဥယ ဒီးပွၚကေိဖိသ့ဥတဖဥ မၚလၚမၚကပီၚဃုဏတႈနဥ့လီၚ’

ဎူဘလံဥအတႈလုႈမံးဆါအံၚ ဘဥတႈတီခိဥရိဥမဲ လုႈထီဥအီၚလ႕ ကီႈပဎီၚ ကဲးသလံးတႈအိဥဖွိဥကရ႕ တႈကူဥဘဥကူဥသ့အခီမံဥရွ႕ႈ အပွၚပ႕ၚလီႈဆ့ဥနီၚ တလးပ႕ Bishop Noel Saw Naw Aye နဥ့လီၚ’ မၚလၚမၚကပီၚတႈသ့ဥတဖဥ မၚ၀ဲတႈလဲၚဖးထီ ဆူဎူဘလံဥအပဲႀတီအိဥ၀ဲတႈလီႈ ဒီးမၚ၀ဲဎူဘလံဥအတႈထုကဖဥ လ႕ဎူဘလံဥအပဲႀတီအမဲဏညါ ၀ံၚဒီးႏုဏလီၚခီဖ်ိ၀ဲ ဎူဘလံဥအပဲႀတီ ဆူ Cathedral တႈဘါသရိဥဖးဒိဥအပူၚည ဒ္သိးအကစးထီဥ၀ဲ တႈဘူဥထီဥဘါထီဥ အတႈရဲဥလီၚက်ဲၚလီၚအဂီႈနဥ့လီၚ’

ဖဲအတႈစံဥတဲၚတဲလီၚတႈအပူၚ ၀့ႈတကူဥတလးပ႕လီႈက၀ီၚ တႈကူဥဘဥကူဥသ့အခီမံဥရွ႕ႈ အပွၚပ႕ၚလီႈဆ့ဥနီၚ Rev. Fr. Abraham Shwe Win ပဏဖ်ါထီဥ၀ဲတႈမုႈလႈ ဒ္အအ႕ဥလီၚတူႈလိဏ၀ဲ ခါလ႕အပူၚကြံဏပွၚအိဥ၀ဲဒီး တႈခီဥတႈရီဥတႈသ့ဥတဖဥ ဘဥဆဥ ကတိၚဆူဥထီဥတႈ ဒီးစံး၀ဲဒ္သိး ပွၚကပဏလီၚသး ဂ႕ႈဂ႕ႈက်႕ၚက်႕ၚ လ႕တႈလဲၚကဒီးဆူညါအဂီႈနဥ့လီၚ’ ဒူဥဖိထ႕ဖိ မ့ႈ၀ဲတႈမၚလိလီႈအဆိကတ႕ႈယ ဒီးသရဥသိဥလိတႈသ့ဥတဖဥ မ့ႈ၀ဲဟံဥခံဖ်႕ဥတဖ်႕ဥယ ဒီးပကဘဥဖံးဃုဏမၚဃုဏတႈ လ႕ဖိဒံဖိသဥသ့ဥတဖဥ အခါဆူညါအဂီႈယ ဒီးတႈကူဥဘဥကူဥသ့ မ့ႈ၀ဲတႈအိဥဖွိဥကရ႕အတႈဖံးတႈမၚ လ႕အကါဒိဥအက်ါတခါအဂ့ႈ စံး၀ဲနဥ့လီၚ’

မ႕နႈ့ဆီဥခံ၀ဲ သရဥသိဥလိတႈသ့ဥတဖဥ ဒ္သိးအကထုးစုနဲဥက်ဲ၀ဲ သူဥဘီသးစႈသ့ဥတဖဥ ဃုဏဒီးတႈသးခုကစီဥအလုႈအပွၚ့ယ ဒီးစံး၀ဲလ႕ တႈအိဥဖွိဥကရ႕အတႈကူဥဘဥကူဥသ့အတႈဖံးတႈမၚအတႈပညိဏ တမ့ႈ၀ဲလ႕ ပွၚကဲဒိဥထီဥလ႕ တႈဖံးတႈမၚအံၚအဖီခိဥဘဥဒီး မ့ႈ၀ဲဒ္သိး တႈအီဥကူးအီပွဲၚ ကအိဥထီဥ၀ဲလ႕ ပွၚခဲလ႕ဏအဂီႈနဥ့လီၚ’ ကတိၚဟ့ဥဂံႈဟ့ဥဘါ၀ဲ ဒူဥဖိထ႕ဖိသ့ဥတဖဥလ႕ တႈအိဥဖွိဥကရ႕ အိဥဘူးဒီး လဲၚတႈဒီးအ၀ဲသ့ဥ လ႕အအိဥဒီး တႈမၚလိအတႈခြဲးတႈဎဏသ့ဥတဖဥနဥ့လီၚ’

လ႕တႈကူဥဘဥကူဥသ့အခီမံဥရွ႕ႈအခ႕ဥစးယ Br. Joseph Than Htaik Aung, FSC ကတိၚစံးဘ်ဳးစံးဖွိဥတႈ နဥ့လီၚ’ စံးဘ်ဳးစံးဖွိဥ၀ဲ ကဥဒံဥနဲဥခေါလ္စ္ဘိဥ အတႈတီခိဥရိဥမဲတႈ ဒီးတလးပ႕သ့ဥတဖဥအတႈထုးစုနဲဥက်ဲတႈနဥ့လီၚ’ စံး၀ဲလ႕ ပွၚကေိဖိသ့ဥတဖဥစ့ႈကီး မ့ႈ၀ဲပွၚလဲၚတႈဖိသ့ဥတဖဥ လ႕တႈမုႈလႈအပူၚနဥ့လီၚ’

Bishop Noel Saw Naw Aye ကတိၚဟ့ဥသဆဥထီဥတႈ ဒ္သိး ပွၚကဖးလံဏ ဒီးဒုးသ့ဥနီဥထီဥက့ၚ၀ဲ ဘီမုႈစ႕ဖွိဥကရ႕ အကိတိဥခိဥက်႕ႈ လ႕အမ့ႈ၀ဲပွၚကီႈပဎီၚတဂၚ (ဦးသန္႔) အတႈကတိၚလ႕အမ့ႈ၀ဲ ပွၚကိးဂၚဒဲးလ႕အဖးလံဏ မ့ႈ၀ဲပွၚလ႕အအိဥဒီးတႈလဲၚထီဥလဲၚထီနဥ့လီၚ’ စံး၀ဲဒ္သိးပွၚကဖးလံဏ အစွၚကတ႕ႈတဘ့ဥ လ႕တနံဥအတီႈပူၚနဥ့လီၚ’ မ့မ့ႈလ႕အကစႈဒဥ၀ဲတခီ ဖး၀ဲလံဏတဘ့ဥ ဖဲတလါအတီႈပူၚအဂ့ႈဒုးသ့ဥညါ၀ဲနဥ့လီၚ’ စံးကဒီး၀ဲဒ္သိး ပွၚကဃုထ႕ ဖးလံဏလ႕အဂ့ၚ၀ဲသ့ဥတဖဥအဂီႈနဥ့လီၚ’ လ႕နဥ့အမဲဏညါ စံး၀ဲဒ္သိး ပွၚကဖး၀ဲလံဏလ႕အအိဥဒီးတႈဂ့ႈတခါဃီ ဘဥဆဥ အိဥ၀ဲဒီးပွၚကြဲးတႈဂ့ႈအံၚ လ႕အလီၚဆီလိဏအသးတဘ်ဳးဂၚသ့ဥတဖဥ ၀ံၚအလီႈခံ ပွၚကဘဥကြႈထံဆိကမိဥက့ၚတႈလ႕ တႈဂ့ႈအံၚအဖီခိဥ လ႕အအိဥဒီးပွၚဖးလံဏအကစႈဒဥ၀ဲ အတႈထံဥ အတႈဆိကမိဥသ့ဥတဖဥအဂီႈနဥ့လီၚ’

တႈမၚလိမၚဒိးတႈအတႈလီႈတႈက်ဲ အတႈဖံးတႈမၚ အတႈဂ့ႈတႈက်ိၚသ့ဥတဖဥ ဘဥတႈပဏဖ်ါထီဥအီၚလ႕ Cathedral တႈဘါသရိဥအကပၚ ဒ္သိးပွၚကသ့သ့ဥညါအါထီဥ တႈဂ့ႈတႈက်ိၚသ့ဥတဖဥအဂီႈနဥ့လီၚ’

တႈရဲဥလီၚက်ဲၚလီၚခဲလ႕ဏသ့ဥတဖဥ၀ံၚအလီႈခံ ပွၚမၚလၚကပီၚဃုဏတႈသ့ဥတဖဥ အီဥဃုဏသကိးမုႈဆါခီအတႈအီဥ လ႕အဒုးကဲထီဥ တႈမၚဆူဥထီဥ တႈရ့လိဏသး တႈသ့ဥညါအါထီဥသကိးသး လ႕ခါဆူညါ ဖိဒံဖိသဥဒီးသးစႈသ့ဥတဖဥ အတႈဒိဥထီဥထီထီဥလ႕ တႈကူဥဘဥကူဥသ့အဂီႈနဥ့လီၚ’

Archdiocese of Yangon Celebrates Education Jubilee      Honors Teachers and Students as Pilgrims of Hope