Myitkyina တလးပ႕လီႈကဝီၚ ပဏလီၚဝဲတႈနဲဥက်ဲ လ႕တႈကြႈထြဲတႈအခိဥအဃ႕ၚအဂီႈ တႈကစီဥ

Myitkyina တလးပ႕လီႈကဝီၚ မၚလၚကပီၚဝဲတႈဘဥတ့အဆ႕ကတီႈ မ့ႈဝဲဃုဏဒီးတႈအိဥဖွိဥရိဖွိဥသကိး လ႕တႈဒီသူဥပဏသး ဘဥဃးဒီးတႈအခိဥအဃ႕ၚ အတႈဂ့ႈအဖီခိဥဒီးပဏလီၚဝဲ တႈဖံးတႈမၚအတႈရဲဥလီၚက်ဲၚလီၚ ဘဥဃးဒီးတႈကြႈထြဲတႈအခိဥအဃ႕ၚန႔ဥလီၚ.

ဖဲတႈမၚအသးအံၚအပူၚ ပွၚ ၈၅ ဂၚသ့ဥတဖဥမၚဃုဏသကိးတႈလ႕ Myitkyina တလးပ႕လီႈကဝီၚ St. Thomas Hall တႈလီႈအပူၚ ဖဲလါအီးကထိဘ႕ဥ ၂ သီ အမုႈနံၚန႔ဥလီၚ.

တႈမၚအသးအံၚ ဘဥတႈကရ႕ကရိထီဥအီၚလ႕ တႈမ့ႈတႈတီဒီး တႈဃုတႈဖိးအခီမရွ့ဥ (Justice and Peace Commission) ဒီးဘဥတႈစးထီဥအီၚဖဲ ဂီၚခီ ၉ နဥရံဥ ဒီးမုႈဆါခီ ၁ နဥရံဥ မ့ႈတလးပ႕လ႕အအိဥဘွံးလ႕တႈဖံးလီၚမၚလီၚ Bishop Francis Daw Tang ဒီး Vicar General Fr. Peter Hka Aung Tu ဒီးသီဘူဥသီခါသ့ဥတဖဥ တႈအိဥဖွိဥသရဥသ့ဥတဖဥ သရဥအသိဥလိတႈသ့ဥတဖဥ ပွၚကေိဖိသ့ဥတဖဥ ဒီးခ႕ဥစးလ႕ သီခါလီႈကဝီၚလ႕ Myitkyina တလးပ႕လီႈကဝီၚအပူၚသ့ဥတဖဥ ဖံးဃုဏမၚဃုဏတႈန႔ဥလီၚ.

တႈမၚအသးအံၚ ဘဥတႈစးထီဥအီၚလ႕ Msgr. Peter Hka Aung Tu အတႈကတိၚတုႈလိဏဝဲ ပွၚဟဲမၚဃုဏသကိးတႈသ့ဥတဖဥ ဒီးစံးဝဲလ႕တႈအိဥဖွိဥကရ႕အမူအဒါ မ့ႈဝဲဒ္သိးပွၚကစံးဆ႕က့ၚ မူခိဥကလံၚသီဥဂီၚအတႈလဲလိဏကြံဏအသး ဒီးပွၚကဘဥမၚဆူဥထီဥတႈကြႈထြဲ တႈအခိဥအဃ႕ၚအဂ့ႈန႔ဥလီၚ.

စံးဝဲလ႕ မူခိဥကလံၚသီဥဂီၚအတႈလဲလိဏအသး ဒီးတႈအခိဥအဃ႕ၚဟးဂုဏဟးဂီၚဝဲသ့ဥတဖဥ အတႈတူၚလီၚဝီလီၚဝဲသ့ဥတဖဥ ပွၚဘဥခီဖ်ိထံဥဘဥအီၚ တမ့ႈထဲလ႕ Kachin ကီႈဆ႕ဥအပူၚဘဥဒီး မ့ႈဝဲလ႕ထံကီႈဒီဘ့ဥအပူၚ ဒီးလ႕ဟီဥခိဥဒီဘ့ဥအပူၚန႔ဥလီၚ.

ဒုးသ့ဥနီဥထီဥဝဲပွၚဟဲမၚဃုဏသကိးတႈ ဘဥဃးဒီး Mali Hka ထံက်ိအဂ့ႈ ဒီးစံးဝဲလ႕ ဆ႕ကတီႈလ႕အပူၚကြံဏ ထံက်ိအံၚအိဥဒီးထံလ႕အကဆွ႕ကဆွီဝဲ ဒီးဃံလၚဝဲ ဒီးမ့ႈလ႕တႈအခိဥအဃ႕ၚဟးဂုဏဟးဂီၚဝဲ ဒီးမ့ႈလ႕ပွၚခူဥထူးထီဥထူ ဒီးပွၚကညီသ့ဥတဖဥအတႈအိဥမူ ဖံးတႈမၚတႈတၾက႕းတဘဥဝဲသ့ဥတဖဥအဃိ ထံက်ိအံၚဘဥတုႈဘဥဝဲတႈသ့ဥတဖဥအံၚန႔ဥလီၚ.

မ႕န႔ႈဆီဥခံဝဲသီခါလီႈကဝီၚသ့ဥတဖဥ လ႕ Myitkyina တလးပ႕လီႈကဝီၚဖးဒိဥအပူၚ ဒ္သိးကမၚဒ္ိဥမၚဆူဥထီဥဝဲ တႈဒီသူဥပဏသး ဘဥဃးဒီး Laudato Si’ ဒ္သိးပွၚကဖံးတႈမၚတႈသပွႈကတ႕ႈ လ႕တႈကြႈထြဲကဟုကဎဏပဟံဥပဃီ တႈကြႈထြဲကဟုကဎဏ ပဟီဥခိဥခ်႕အံၚအဂီႈန႔ဥလီၚ.

ပွၚလ႕အကတိၚထူးစုနဲဥက်ဲတႈ Mr. Christie ဒုးသ့ဥညါဝဲ တႈဂ့ႈမိႈပွႈတမံၚလ႕အမ့ႈဝဲ ထံမူ (Living Water) ဒီးမ့ႈဝဲ ပႈပါ Francis အလံဏပရ႕လ႕ Laudato Si’ န႔ဥလီၚ.

ပဏဖ်ါထီဥဝဲတႈဂ့ႈလ႕ ဟီဥခိဥအံၚအတႈကိးပသူထီဥဒီး ပွၚဖွီဥဖိဎဏဖိသ့ဥတဖဥအတႈကိးပသူထီဥ ဘ်းစ႕လိဏသးအဂ့ႈ ဒီးစံးဝဲလ႕ ပွၚလ႕အဘဥဒိဘဥထံးသ့ဥတဖဥဒီး ပွၚဖွီဥဖိဎဏဖိသ့ဥတဖဥ ဘဥတုႈဘဥတႈနးနးကလဲဏ မ့ႈလ႕တႈအခိဥအဃ႕ၚဟးဂီၚကြံဏဝဲ ဒီးမူခိဥကလံၚသီဥဂီၚ အတႈတဘဥလိဏဖိးဒ့လိဏအသးသ့ဥတဖဥအဃိန႔ဥလီၚ.

ပွၚဟဲမၚဃုဏသကိးတႈလ႕ တႈမၚအသးအံၚအပူၚသ့ဥတဖဥ ဘဥတႈဒုးသ့ဥညါနႈပ႕ႈအီၚလ႕ တႈနႈပ႕ႈတႈအခိဥအဃ႕ၚ အတႈအိဥအသးလီၚတံႈလီၚဆဲး ဒီးဒ္သိးပွၚကသ့ဥညါလ႕ ပွၚကက့ၚမၚဂ့ၚတႈလ႕အၾက႕းဝဲဘဥဝဲသ့ဥတဖဥ ဒီးပွၚကဖံးတႈမၚတႈလီၚတံႈလီၚဆဲးသပွႈကတ႕ႈ အဂီႈန႔ဥလီၚ.

Mr. Christie စံးဝဲလ႕ မူခိဥကလံၚသီဥဂီၚအတႈလဲလိဏအသး ဟီဥခိဥအတႈလ႕ၚထီဥဝဲ ကလံၚသီဥဂီၚဘဥအ႕ဘဥသီဝဲ တႈအခိဥအဃ႕ၚဟးဂုဏဟးဂီၚဝဲ မ့ႈလ႕ပွၚကညီသ့ဥတဖဥ တသ့ဥညါလီၚအမူအဒါလီၚတံႈလီၚဆဲးအဃိ ဃုဏဒီးတႈခူဥထူးထီဥတႈလ႕ ဟီဥခိဥလဏသ့ဥတဖဥန႔ဥလီၚ.

လ႕န႔ဥအမဲဏညါ တႈဂီၚမူဖုဥကီဏဖိလ႕အပဏဖ်ါထီဥဝဲ ပွၚခူဥထူးထီဥထူလ႕ Kachin အကီႈအပူၚ ကဲထီဥဝဲတႈဘဥဒ္ိဘဥထံးလ႕ တႈအခိဥအဃ႕ၚအဂ့ႈ ဘဥတႈပဏဖ်ါထီဥအီၚလ႕ ပွၚအါဂၚအမဲဏညါန႔ဥလိီၚ.

ပွၚဟဲမၚဃုဏသကိးတႈ Mr. Zaw Mai စ့ႈကီး ပဏဖ်ါထီဥဝဲတႈဂ့ႈတမံၚလ႕ ပိဏမုဥသးပွၚလ႕တႈဂီၚမူအပူၚ အိဥဖ်ါဝဲဒ္ပွၚလ႕အလီႈအက်ဲတအိဥလဲၚဝဲ ဒီးခါဆူညါအတႈလီၚတံႈလီၚဆဲးတအိဥလဲၚဝဲ ဒီးတသ့က့ၚတုႈဝဲဆူအဟံဥအဃီအဂ့ႈန႔ဥလီၚ.

ပိဏမုဥအံၚဘဥတုႈဘဥတႈလ႕ မ့ႈဝဲတႈဖ့ဥဆ႕ တႈသူးလီၚသူးက်ဲ ဒီးတႈအခိဥအဃ႕ၚဟးဂုဏဟးဂီၚဝဲသ့ဥတဖဥအဃိ ဘဥပဏတ့ႈကြံဏအကရ႕ကရိ အဒူအသဝီဒီး ခါဆူညါတႈလီၚတံႈလီၚဆဲးတအိဥဝဲဘဥန႔ဥလီၚ.

လ႕ပွၚဟဲမၚဃုဏသကိးတႈအက်ါ ကေိဖိတဂၚပဏဖ်ါထီဥဝဲအတႈပဏလုႈဒိဥပွ့ၚဒိဥဝဲ Laudato Si’ ဒီးစံးဝဲလ႕ ပႈပါအတႈကြဲးအံၚကဲထီဥဝဲတႈမၚစ႕ၚလ႕အဂီႈ ဒ္သိးအကနႈပ႕ႈဝဲ ထံ ဒီးပွၚလိဥဘဥသကိးဝဲလ႕ ပွၚကဘဥကြႈထြဲကဟုကဎဏ ထံ အကါဒိဥဝဲအဂ့ႈန႔ဥလီၚ.

ပွၚဟဲမၚဃုဏသကိးတႈသ့ဥတဖဥ ဘဥတႈကတိၚဟ့ဥဂံႈဟ့ဥဘါအီၚ ဒ္သိးအကဖံးတႈမၚတႈသပွႈပွႈလ႕ ဒူဥဖိထ႕ဖိအဂီႈ သီခါလီႈကဝီၚသ့ဥတဖဥအဂီႈ ဒီးလ႕ကရ႕ကရိသ့ဥတဖဥအဂီႈ ဒ္သိးအကသ့ဥညါနႈပ႕ႈသကိးဝဲ တႈကြႈထြဲအခိဥအဃ႕ၚ ဒီးတႈဒိးန႔ႈဃုဏသကိးမူဒါအကါဒိဥဝဲ အဂ့ႈန႔ဥလိီၚ.

တႈမၚလၚမၚကပီၚတႈဘဥတ့အဆ႕ကတီႈအံၚ မ့ႈဝဲတႈကြႈထံဆိကမိဥ ဒ္သိးပွၚကမၚဆူဥထီဥ တႈဒီသူဥပဏသး ဘဥဃးဒီးတႈအခိဥအဃ႕ၚ ဒီးမ့ႈဝဲတႈဂ့ႈတမံၚလ႕ ဟ့ဥဂံႈဟ့ဥဘါဝဲတႈအိဥဖွိဥကရ႕ဖိသ့ဥ္တဖဥ ဒ္သိးအကကြႈထြဲကဟုကဎဏပမိႈဟီဥခိဥအဂီႈန႔ဥလီၚ.

ပွၚဟဲမၚဃုဏသကိးတႈသ့ဥတဖဥ ဘဥတႈမၚဆူဥထီဥအီၚဒ္သိးအကသ့ဥညါနႈပ႕ႈဝဲ ဟီဥခိဥဒီးပွၚဖွိဥဖိဎဏဖိသ့ဥတဖဥ အတႈကိးပသူထီဥဝဲ ဒီးတႈအိဥဖွိဥကရ႕အိဥဒီးအမူဒါ ဒ္သိးအကမၚ အကစံးဆ႕က့ၚတႈအံၚခီဖ်ိတႈထုကဖဥ ဒီးတႈဖံးတႈမၚတႈသပွႈကတ႕ႈအဂီႈန႔ဥလီၚ.

တႈကြႈထြဲကဟုကဎဏတႈဘဥတ့အဆ႕ကတီႈ (Season of Creation) ဘဥတႈသ့ဥနီဥထီဥအီၚကိးနံဥဒဲး မ့ႈဝဲလ႕ လါစဲးပတ့ဘ႕ဥ ၁ သီ တုႈလ႕လါအီးကထိဘ႕ဥ ၄ သီ မ့ႈဝဲဟီဥခိဥဒီဘ့ဥတႈအိဥဖွိဥကရ႕ဖိသ့ဥတဖဥ အတႈအိဥဖွိဥသကိးလ႕တႈထုကဖဥ ဒီးတႈဖံးဃုဏမၚဃုဏတႈအပူၚ လ႕တႈကြႈထြဲကဟုကဎဏပမိႈဟီဥခိဥအံၚအဂီႈန႔ဥလီၚ.